CCOO refuga que s'instale n'Asturies "el modelu Ayuso" d'universidá privada

Piden al Executivu que defenda a la Universidá d'Uviéu

El secretariu xeneral del Sindicatu d'Enseñanza de CCOO Asturies, Borja Llorente, refugó esti xueves l'apertura d'universidaes privaes n'Asturies y pidió’l cese de la directora xeneral d'Universidaes, Cristina González, por apoyar el “modelu Ayuso” de sofitu a la enseñanza cimera privada en perxuiciu de la pública.

Nuna rueda de prensa a la que tamién fueron el secretariu xeneral de CCOO n'Asturies, José Manuel Zapico y la secretaria xeneral de la Sección Sindical de CCOO de la Universidá d'Uviéu, Ángeles Fal, Llorente refirióse a les palabres apocayá de González calificando como positiva la posible apertura d'un campus de la Universidad Europea en Xixón.

Según denunció’l dirixente sindical, tres la operación de desembarcu de la Universidad Europea en Xixón ta'l “fondu utre” suecu EQT Partners y denunciaron que la privatización de la universidá va en perxuiciu tanto de la calidá de la enseñanza y la investigación básica, como de la so accesibilidá por parte de les clases más desfavorecíes.